Unha espetada e un bingo musicais animarán a tardiña do sábado das festas de Silleda

Unha espetada e un bingo musicais animarán a tarde do sábado das festas de verán de Silleda. SIC Iniciativas Culturais quixo aportar o seu “pequeno grao de area” aos festexos que comezan mañá na capital trasdezá. Coa colaboración e apoio do Concello de Silleda, os veciños do Barrio das Baratas e a comisión de festas, pon en marcha o que deu en chamar a súa primeira Espetada Musical, “unha proposta de actividade un tanto inusual por estas terras, feita pola veciñanza e para a veciñanza, coa que esperamos darlle un ambiente festivo e bailongo ao serán do sábado 6 de xullo”, explica Xosé Filloy González, presidente de SIC.

A Espetada Musical comezará ás 20 horas na conxunción da praza do Siñor Afranio e a rúa Cartaxena, a carón dos xardíns en fronte ao consistorio. Os asistentes poderán compartir unha merencea –ou drunch, concepto en inglés que combina as verbas dinner (cea) e lunch (comida)–, composta de espetos variados e que servirán acompañados de cócteles estivais, tanto para adultos coma para crianzas, con e sen alcol. Non será necesario facer reserva, pois os tíckets para os espetos e as bebidas poderanse adquirir no propio lugar da festa.

“E despois de enchermos o bandullo e compartirmos os cócteles de verán ao ritmo da música na praza, chegará o prato forte da Espetada: o Bingo Musical”, contan desde SIC. A diferenza dun bingo convencional, neste caso non se sacarán as 90 bolas de rigor, senón que irán soando na praza de xeito aleatorio 90 cancións “populares e festeiras, temas que todas e todos coñecemos e que os asistentes terán que ir adiviñando e marcando nos seus cartóns”. “Loxicamente –subliñan–, e aquí si que seremos convencionais, haberá premios para os que canten liña e bingo”.

Desde SIC convidan a toda a veciñanza a que vista os seus sombreiros máis estrafalarios –é “obrigatorio” levar esta prenda– para compartir “cousas ricas e bailes pegadizos na tardiña do sábado das festas e prepararnos xuntos para a festaza que nos espera pola noite”. “Está máis que garantido que vamos a pasárnoslo bien, toda a nochentera e que puede ser nuestra gran noche”, remachan desde a organización do evento.